PRIMAVÉERA

A’n vdìiva l’óora ed cùrert incòunter,
butèerem de drée dal spaali
giurnèedi grìiši ch’i apasisn’al cóor.
Adèes t’ìi turnèeda cun la fròunt èelta,
la bòca ingorda
a bèvver i raag dal sóol,
t’è avèert i braas
tè t’ìi vistìida ed fióor.
Fàam imbèrriagher dal nóov profùmm di prèe,
mandem cl’udòor antìigh ed tèera móoja…
sèmper ùmda cume i-òoc di ragasóo.
Primavera t’ìi ‘na poèsia mai scrìta
e insìma a èeli ed farfàala
a t’hò vìst arivèer.
Po’ come un pitòor tùtt…
tùtt t’èe culurèe.
L’ùultma spenlèeda tl’è dèeda pròopia chè…
dèintr’a stè cóor.

Sauro Roveda (Dial. di Carpi)

Trad.: PRIMAVERA
Non vedevo l’ora di correrti incontro/gettarmi dietro alle spalle/giornate grigie che appassiscono il cuore./Ora sei tornata con la fronte alta,/la bocca ingorda/a bere i raggi del sole,/hai aperto le braccia/ti sei vestita di fiori./Fammi ubriacare del nuovo profumo dei prati,/mandami l’odore antico di terra bagnata…/umida come gli occhi dei fanciulli./Primavera sei una poesia mai scritta/e sopra ad ali di farfalla/io ti ho vista arrivare./Poi come un pittore tutto…/tutto hai dipinto./L’ultima pennellata tu l’hai data proprio qui…/dentro a questo cuore.

 

Consenso ai cookie con Real Cookie Banner