Quand’éel màama al mumèint

de sfetlèer ‘na còppa, ùun salàam?

a’m vóot próopria fèer murìir ed fàam?

Ch’sa sràala pò

despichèer da la pèerdga ‘na salsìssa,

vóot ch’a matìsa?-

Porta pasìinsia Tugnètt,

te’n vèdd che al furmèint

quèeši quèeši l’è biònd?

Pèr al méeder, intóoren a la tèevla

a gh’gnirà al finimònd!

E pò a nè s’à màai,

ch’an vègna al caplàan

a bendìir la stàala, i ciùuš, i sràai…

già l’ìiva dìtt l’éetr’àan,

ch’l’andèeva màat pèr chìi nóoster salàam!

E…e la tò mèstra,

e t’lìit bèela descurdèeda?

Se a’n fùss pèr cal persùtt

a st’óora chè,

ed gh’avrèvv di vóot a c’sé brùtt!

Dio d’bendìsa Tugnètt st’ìi gulóoš,

perchè t’fèet caschèer la gòssa, t’ìi šmanióoš!

Dàai, mènga tùtt i gh’àan la tò furtùuna,

ed durmìir tùtt l’àan

in dla càambra dìi salàam!

(Sauro Roveda. Dialetto di Carpi)

LA CAMERA DEI SALUMI

-Quand’è mamma il momento/di affettare una coppa, un salame?/Vuoi proprio farmi morire di fame?/Che cosa sarà poi/staccare dalla pertica una salciccia,/vuoi farmi ammattire?-/Porta pazienza Tugnètt,/non vedi che il frumento/quasi quasi è maturo?/Per la mietitura, intorno alla tavola/ci sarà il finimondo!/E poi non si sa mai,/che non venga a farci visita il cappellano/a benedire la stalla, i porcili, i recinti…/già aveva detto l’anno scorso,/che andava giù di testa per quei nostri salami!/E…e la tua maestra,/te la sei già dimenticata?/Se non fosse per quel prosciutto/a quest’ora,/avresti dei voti così brutti!/ Dio ti benedica Tugnètt come sei goloso,/perché  ti fai venire l’acquolina in bocca, sei smanioso!/ Dai, non  tutti hanno la tua fortuna,/di dormire tutto l’anno/ nella camera dei salumi!