Poesia di Nerina Ardizzoni (dialetto di Renazzo di Cento). Poesia segnalata al Concorso “Poetar Padano” di Carpi ed. 2015.
Foto pubblicata nel libro “La Rezdôra” di Sara Prati e Giorgio Rinaldi. Ed. CDL
L’invtidùra dal ninén
Un són spusèda in dicèmbar,
quand l’è frèd e fòra a nèva.
Quand ira spòsa frèsca
tót i ann aspètva l’aniversàri,
un figurèva un bel vistì, ‘na bona zèna
e pò dop … a savì,
ma tót i ann, cal famòs dè
gh’ira da fèr salàm e cutghén,
gh’ira dònca da mazèr al ninén!
Un narvòs da birichén,
in mèz a salàm e salamén,
pò la còpa, pò i gnuchén,
i macarón e i grasùa a la fèn.
Piàn pianén è pasè i ann,
è canbiè incósa,
énch in fàt ad salàm;
énch in canpàgna
è rivè al supermarche,
‘na vèra e propria libartè.
Adès però a v’degh la veritè,
pasè zért vujén,
a rimpianz l’invtidùra dal ninén!
(Nerina Ardizzoni)
Norcineria [lett.: la “svestitura” del maiale]//
Mi sono sposata in dicembre,/ quando fa freddo e fuori nevica./ Appena sposata/ aspettavo l’anniversario,/ sognavo un bel vestito, una cenetta,/ e poi dopo … il seguito che tutti sapete./ Ma tutti gli anni, quel fatidico giorno,/ c’erano in giro salami e cotechini,/ c’era insomma da uccidere il maiale!/ Una rabbia indicibile,/ fra salami e cotechini, poi la coppa ed “i gnocchini”,/ i maccheroni ed infine i ciccioli./ Piano piano sono trascorsi gli anni,/ tutto è cambiato,/ anche in fatto di affettato;/ anche in campagna/ hanno aperto i supermercati,/ vera e propria liberazione./ Però ora, vi dico la verità,/ passate certe voglie,/ rimpiango la norcineria.
