Poesia di Sauro Roveda (dialetto di Carpi)
Mè a éera ùun ragasóol ed campàagna,
fióol ed cuntadèin.
A girèeva de-schèelsa istèe e invèeren,
co’l brèeghi s-cianchèedi in dal cùul,
sèmper mušnèint…
mà dè dèinter ùun cóor pulìi
come l’àacua dal pòss.
La mè giurnèeda
l’éera fàata ed quèei da gnìint,
perchè l’è fàata a csè
la vìta ed la póovra gìint.
A’m dešdèeva al cantèer dal gàal,
e ùun ràag ed sóol
cal’m féeva al blèdegh sòtta al nèeš.
Sòtt-sìira, stùff mòort, a m’indurmintèeva
co’i scùur sèmper avèert,
sèeinsa paùuri….
e con ùun pcòun ed lùuna,
lughèeda sòtta al cusèin.
COSE DA NULLA
Io ero un bambino di campagna,/figlio di contadini./Camminavo scalzo estate ed inverno,/coi pantaloni strappati nel sedere,/sempre sudicio…/ma dentro un cuore limpido/come l’acqua del pozzo./La mia giornata/era fatta di cose da nulla,/perché è così che è fatta/la vita della povera gente./Mi svegliava il cantare del gallo,/e un raggio di sole/che mi faceva il solletico al naso./Verso sera, stanco morto, mi addormentavo/con le imposte sempre aperte,/senza paure…/e con un pezzetto di luna,/nascosta sotto al cuscino.
